Барысаў: За здымку забастоўкі затрыманы фотакарэспандэнт Аляксандр Зянкоў

Фотакарэспандэнт Аляксандр Зянкоў, які супрацоўнічае з незалежным барысаўскім сайтам ex-Press.by, быў затрыманы сёння каля дзевяці гадзін раніцы на тэрыторыі спецаўтагаспадаркі, дзе другі дзень страйкуюць працаўнікі.

Страйкоўцы прыйшлі сёння а восьмай гадзіне раніцы ў спецаўтагаспадарку, каб працягнуць «сядзячы» страйк. Фотакарэспандэнт Аляксандр Зянкоў праводзіў здымку. У хуткім часе туды прыехаў дырэктар Барысаўскага УП «Жыллё» Мікалай Шархун ў суправаджэнні двух маёраў міліцыі. Адзін з іх - маёр Волкаў - затрымаў Зянкова і правёў у Барысаўскае РУУС «для высвятлення асобы».

Як паведаміў Аляксандр па мабільным тэлефоне, у міліцыі ў яго адабралі апаратуру. Пасля гэтага сувязь абарвалася, тэлефон на дадзены момант адключаны.