Марціну Углу ў чарговы раз адмовілі ў беларускай візе
Марцін Угла, старшыня швецкай праваабарончай арганізацыі Östgruppen (фота svaboda.org)
Старшыня шведскай праваабарончай арганізацыі Östgruppen Марцін Угла не атрымаў беларускай візы. Як патлумачыў праваабаронца “Радыё Свабода”, ён разам з сям'ёй збіраўся ў чэрвені ехаць ва Украіну на чэмпіянат Еўропы па футболе. На зваротным шляху яны планавалі вяртацца праз Беларусь.
Але Амбасада Рэспублікі Беларусь у Стакгольме вырашыла адмовіць праваабаронцу нават у транзітнай візе.
«Відавочна, мяне хочуць пакараць за тое, што я часта крытыкую беларускія ўлады за парушэнні правоў чалавека. Але трошкі смешна, што мне не дазваляюць разам з дзецьмі нават ездзіць праз Беларусь. З аднаго боку, вядома, шкада, што мяне не пускаюць у Беларусь, але я не збіраюся маўчаць пра стан правоў чалавека ў Беларусі з-за гэтай адмовы. Наадварот буду працягваць сваю працу яшчэ больш упарта ў падтрымку сваім сябрам і калегам у Беларусі», - так пракамэнтаваў гэтае здарэнне Марцін Угла.
ПЦ “Вясна” нагадвае, што гэта ўжо пятая адмова ў візе ў Беларусь для Марціна Углы, апошні раз ён змог наведаць нашу краіну ў чэрвені 2006 года. Беларусь – прыярытэтная краіна ў дзейнасці Östgruppen. Арганізацыя мае шырокія кантакты з беларускім дэмакратычным рухам і шмат гадоў супрацоўнічае з вядучымі праваабарончымі арганізацыямі краіны.
