Суадказчыкам па зыску гомельскага праваабаронцы выступіць ЦВК

30 траўня суддзя суда Цэнтральнага раёна Гомеля Марына Дамненка пры разглядзе зыску праваабаронцы Леаніда Судаленкі да дзяржаўнай казны прыцягнула ў якасці суадказчыка Цэнтральную выбарчую камісію. Нагадаем, суд Цэнтральнага раёна Гомеля прыняў да разгляду зыск праваабаронцы аб кампенсацыі маральнай шкоды з нагоды невыканання рашэння Камітэту па правах чалавека ААН, згодна з якім устаноўлены факты парушэння яго правоў з боку дзяржавы. Падчас выбараў дэпутатаў парламента ў 2004 годзе Леанід Судаленка сабраў неабходную для рэгістрацыі ў якасці кандыдата ў дэпутаты колькасць подпісаў выбаршчыкаў, але выбарчая камісія адмовіла яму ў рэгістрацыі. І ў акруговай, і ў Цэнтральнай выбарчай камісіі палічылі, што юрыст няправільна ўказаў месца сваёй працы. Пасля абскарджанняў рашэння ў беларускіх судах праваабаронца звярнуўся ў Камітэт па правах чалавека ААН, які прызнаў, што правы грамадзяніна былі парушаны дзяржавай.

Чарговае паседжанне пройдзе 4 чэрвеня ў судзе Цэнтральнага раёна Гомеля.