Яраслаў Берніковіч "спазніўся" на працу ў міліцыю
Убачыўшы ў мясцовай газеце "Вольнае Глубокае" аб'яву пра вакантную пасаду, апазіцыянер напісаў заяву на працаўладкаванне ў якасці старшага інспектара групы інфармацыйнага забеспячэння. І праз два дні атрымаў адмову.
Афіцыйная прычына адмовы ў тым, што "іншы чалавек падаў заяву раней". Так патлумачыў кіраўнік ідэалагічнага аддзела Глыбоцкага РАУС, расказаў Яраслаў Берніковіч:
"Мне патэлефанавалі, сказалі, што ўзялі іншага кандыдата, які падаў заяву на працу раней. Прычым было падкрэслена, што "толькі па гэтай прычыне". На працаўладкаванне ў міліцыі я дужа і не спадзяваўся, але было цікава ведаць: ці возьмуць туды працаваць апазіцыянера, хоць і з адпаведнай адукацыяй. А калі адмовяць, то на якой падставе".
Яраслаў Берніковіч мае дыплом аб вышэйшай адукацыі па спецыяльнасці "палітыка-юрыдычная дзейнасць". Якая адукацыя і спецыяльнасць у "іншага чалавека, які падаў заяву раней", актывіст не ўдакладняў.
Спадар Берніковіч – вядомы ў рэгіёне апазіцыйны актывіст, які стала бярэ ўдзел у выбарчых кампаніях. Падчас мінулай парламенцкай выбарчай кампаніі ён выйшаў з Партыі БНФ, сябрам якой быў досыць працяглы час, бо не падзяляў пазіцыю партыі адносна ўдзелу ў выбарах. Ён актывіст кампаніі "Гавары праўду" і заснавальнік прыватнага выдавецка-рэкламнага прадпрыемства "Прэфект-інфо".
