Заява ГА “БАЖ” з нагоды атакі на сайты БелаПАН
ГА “Беларуская асацыяцыя журналістаў” занепакоеная хакерскай атакай на незалежныя анлайн-медыя – Belapan.com i Naviny.by.
Агрэсіўныя дзеянні супраць гэтых сайтаў распачаліся пасля публікацыі крытычных артыкулаў пра прымусовую яўку студэнтаў на палітычную акцыю з рэлігійнай афарбоўкай “Малітва за Беларусь”.
Папярэдні досвед дазваляе разглядаць гэта як спробу пакараць Belapan.com i Naviny.by за выкананне прафесійных абавязкаў.
Варта адзначыць, што грубае ўмяшальніцтва ў працу незалежных медыя адбываецца ў часе электаральнай кампаніі, калі патрэба людзей у рознабаковай непадцэнзурнай інфармацыі як ніколі высокая.
Мы лічым гэта чарговай праявай сістэмнай палітыкі кантролю над інфармацыяй у нашай краіне з мэтай маніпуляваць грамадскай свядомасцю.
Далучаем свой голас да патрабавання інфармацыйнай кампаніі БелаПАН забяспечыць належнае абслугоўванне яе сайтаў на тэрыторыі Беларусі і абараніць іх ад любых замахаў.
ГА “БАЖ” заклікае спыніць любыя атакі на незалежныя медыя, каб забяспечыць канстытуцыйнае права грамадзян нашай краіны атрымліваць рознабаковую непадцэнзурную інфармацыю з розных крыніц.
Прынята Праўленнем ГА "Беларуская асацыяцыя журналістаў"
05.10.2015
