Жыткавічы: за абразу супрацоўнікаў міліцыі асудзілі мясцовага жыхара
Суд Жыткавіцкага раёна 10 лістапада асудзіў мясцовага жыхара, які працаваў у мясцовым леспрамгасе вальшчыкам леса, абвінаваціўшы яго ў абразе прадстаўнікоў улады паводле арт. 369 Крымінальнага кодэкса.
Справу разглядаў суддзя Андрэй Багданік.
Па матэрыялах абвінавачання, Бажкевіч, “маючы намер на публічную абразу прадстаўнікоў улады – старэйшага ўчастковага інспектара аддзела аховы правапарадку і прафілактыкі маёра міліцыі М. і міліцыянта-кіроўцы сяржанта міліцыі Ж.… выкарыстоўваючы ў якасці прылады здзяйснення злачынства мабільны тэлефон… наўмысна, з мэтай публічнага прыніжэньня гонару і годнасці асобы, выяўленага ў непрыстойнай форме, шляхам відэаздымкі з уласным гукавым суправаджэннем, якія змяшчаюць негатыўную ацэнку супрацоўнікаў, вырабіў і захаваў у памяці тэлефона відэазапіс з удзелам супрацоўнікаў АУС.”
У судзе ён тлумачыў, што да яго дадому прыйшлі супрацоўнікі міліцыі для правядзення разбіральніцтва, нібыта па факце заявы, якая паступіла на ягонае імя. Супрацоўнікаў міліцыі у кватэру ён не пусціў і размаўляў з імі з балкона. Размову ён запісаў і зафіксаваў дзеянні міліцыянтаў, суправаджаючы відэа уласнымі выказваннямі, якія змяшчаюць негатыўную ацэнку гэтых супрацоўнікаў са словамі нецэнзурнай лаянкі.
Праз некалькі дзён яго затрымалі і змясцілі да суда пад варту.
Суд пастанавіў прызначыць яму пакаранне ў выглядзе абмежавання волі тэрмінам на адзін год і шэсць месяцаў без накіравання ў папраўчую ўстанову адкрытага тыпу, са штрафам у памеры 50 базавых велічынь, што складае 1 850 рублёў.
Таксама пастаноўлена спагнаць з яго на карысць пацярпелых маральную кампенсацыю ў памеры па 1 000 рублёў кожнаму, а ў даход дзяржавы яшчэ судовыя выдаткі ў памеры 222 рублі.
