Пяцёра дэпутатаў парламента Германіі сталі "хроснымі" палітвязняў у Беларусі

У межах кампаніі #WeStandBYou Крысціна-Ёхана Шродар, Амід Нурыпур, Джэм Аздэмір і Хана Штайнмюлер (усе з партыі "Саюз 90/Зялёныя"), а таксама Марыя Нойхль (група Прагрэсіўнага альянсу сацыялістаў і дэмакратаў у Еўрапейскім парламенце, Сацыял-дэмакратычная партыя Нямеччыны) сталі "хроснымі" Арцёма Федасенкі, Віталя Брагінца, Дзяніса Воразава, Юрыя Ташкінава ды Ганны Кандраценкі.

Крысціна-Ёхана Шродар

Арцём Федасенка быў дырэктарам незалежнай друкарні, дзе ён выпускаў улёткі. 19 сакавіка 2021 года ён быў арыштаваны па абвінавачванні ў вырабе і распаўсюдзе незарэгістраваных пратэстных улётак, налепак і газет. Суд асудзіў Арцёма да 4 гадоў пазбаўлення волі нібыта за "парушэнне грамадскага парадку" (артыкул 342).

Крысціна-Ёхана Шродар — дэпутатка нямецкага Бундэстага ад партыі "Саюз 90/Зялёныя". Яна стала "хроснай" Арцёма Федасенкі ды так тлумачыць сваё рашэнне:

"Нягледзячы на жорсткія дзяржаўныя рэпрэсіі, народ Беларусі гадамі змагаўся за свабоду, дэмакратыю і сумленныя выбары. Я адчуваю да іх найвялікшую павагу. Арцём Федасенка быў арыштаваны ў 2021 годзе праз сваю прыхільнасць да дэмакратыі. Яго арышт і зняволенне палітычна матываваныя і не могуць быць апраўданыя. Таму я заклікаю да неадкладнага і безумоўнага вызвалення Арцёма Федасенкі ды ўсіх палітычных зняволеных у Беларусі".

Амід Нурыпур

Віталь Брагінец — юрыст і абаронца правоў палітвязняў. Ён абараняў у судзе лаўрэата Нобелеўскай прэміі міру Алеся Бяляцкага. Спачатку Віталь быў арыштаваны 25 траўня 2022 года за ўдзел у пратэстах 2020 года. Пасля яму былі прад'яўленыя абвінавачванні ў "парушэнні грамадскага парадку" (артыкул 342), "распальванні нянавісці" (артыкул 130), "стварэнні пагрозы нацыянальнай бяспецы" (артыкул 361) і "стварэнні экстрэмісцкага фармавання або ўдзелу ў ім" (артыкул 361-1). Суддзя пакараў Віталя 8 гадамі зняволення. Ён таксама быў пазбаўлены сваёй адвакацкай ліцэнзіі.

Амід Нурыпур — дэпутат нямецкага бундэстага і федэральны старшыня партыі "Саюз 90/Зялёныя". Ён другі раз становіцца "хросным" і выказвае салідарнасць з Віталём Брагінцом:

"Я заклікаю да неадкладнага і безумоўнага вызвалення Віталя Брагінца. Віталь — юрыст. Ён нястомна працаваў у імя вяршэнства закона ў несправядлівай дзяржаве. Ён быў адвакатам лаўрэата Нобелеўскай прэміі міру Алеся Бяляцкага і сам стаў ахвярай беларускага рэжыму. Стаўшы яго "хросным", я рашуча падтрымліваю Віталя. Жорсткі прыгнёт з боку беларускага дыктатара мусіць спыніцца. Мы не перастанем заклікаць да вызвалення ўсіх 1 400 палітвязняў у Беларусі. Жыве Беларусь!"

Джэм Аздэмір

Дзяніс Воразаў вывесіў украінскі і беларускі нацыянальныя сцягі на фасадзе аднаго мінскага шматпавярховіка. Ён абмяркоўваў сваю акцыю ў групавым чаце, які быў прызнаны экстрэмісцкім фармаваннем пасля арышту Дзяніса ў верасні 2022 года. Пасля Дзяніса асудзілі да пяці гадоў турэмнага зняволення за "стварэнне экстрэмісцкага фармавання або ўдзел у ім" (артыкул 361-1) і "садзейнічанне экстрэмісцкай дзейнасці" (артыкул 361-4).

Джэм Аздэмір — федэральны міністр харчавання і сельскай гаспадаркі Германіі. Гэта ўжо трэці раз, калі ён становіцца "хросным" палітвязня ў Беларусі. Каментуючы сваё рашэнне стаць "хросным" Дзяніса Воразава, ён заявіў:

"Я заклікаю да неадкладнага і безумоўнага вызвалення Дзяніса Воразава. Ён быў арыштаваны за тое, што ў яго і ягоных сяброў хапіла смеласці вывесіць у Мінску ўкраінскі сцяг. Выступаць супраць дыктатуры ў Беларусі і за мір ва Украіне — гэта не злачынства, гэта права чалавека. Толькі ў Беларусі больш за 1 600 чалавек былі арыштаваныя за ўдзел у антываенных акцыях пратэсту. Як яго "хросны", я цвёрда падтрымліваю тых смелых людзей, якія не адмаўляюцца ад барацьбы за мір і дэмакратыю. Рэпрэсіі дыктатара Лукашэнкі ды яго жорсткага рэжыму мусяць спыніцца, і ўсе палітычныя зняволеныя павінны быць вызваленыя. Жыве Беларусь!"

Хана Штайнмюлер

Юрый Ташкінаў негатыўна адазваўся пра вайну ва Украіне і падзяліўся справаздачамі аб праектах гуманітарнай дапамогі ў сацыяльных сетках. Ён таксама зрабіў ахвяраванне ў беларускі фонд салідарнасці з палітвязнямі. У выніку сваіх дзеянняў Юрый быў асуджаны да 3 гадоў пазбаўлення волі нібыта за "фінансаванне экстрэмісцкай дзейнасці" (арт. 361-2) і "распальванне нянавісці" (арт. 130).

Хана Штайнмюлер — дэпутатка Бундэстага ад партыі "Саюз 90/Зялёныя". Стаўшы яго "хроснай", яна падтрымлівае Юрыя Ташкінава і выступае з наступнай заявай:

"Любому, хто рэалізуе сваё права на свабоду выказвання меркаванняў, падтрымлівае дэмакратычны пратэст або адкрыта крытыкуе ўлады ў Беларусі, пагражае жорсткае пакаранне. На думку беларускай праваабарончай супольнасці, улады злоўжываюць крымінальным заканадаўствам і выносяць празмерна жорсткія прысуды пратэстоўцам і актывістам апазіцыі. Менавіта гэта і здарылася з Юрыем Ташкінавым. Ён выступаў за мір і крытыкаваў дзяржаўную прапаганду дыктатарскага рэжыму ў Беларусі. У выніку ён быў абвінавачаны ў распальванні нянавісці і падтрымцы тэрарыстычнай арганізацыі ды асуджаны да трох гадоў турэмнага зняволення. У межах кампаніі Libereco я бяру на сябе абавязкі яго "хроснай". Я асуджаю гэтую несправядлівасць і заклікаю да неадкладнага вызвалення Юрыя Ташкінава і ўсіх іншых палітычных зняволеных. Усеагульнае права чалавека на свабоду выказвання меркаванняў належыць усім людзям і не павінна абмяжоўвацца ніякім рэжымам!"

Марыя Нойхль

Ганна Кандраценка была арыштаваная 5 траўня 2022 года і асуджаная да трох гадоў турэмнага зняволення за "абразу Лукашэнкі" (артыкул 368) і "абразу прадстаўніка ўлады" (артыкул 369). Яе былая сукамерніца паведаміла, што Ганна пакутуе на захворванне скуры, якое пагоршылася праз працу зняволенай з абіўкай з поліэстэру.

Марыя Нойхль — дэпутатка Еўрапейскага парламента ад сацыял-дэмакратычнай партыі Германіі, а таксама старшыня жаночай групы СДПГ. Яна ўжо ў другі раз становіцца "хроснай". Марыя падтрымлівае Ганну Кандраценку і заяўляе:

"Ганна Кандраценка была арыштаваная 5 траўня 2022 года і асуджаная да 3 гадоў калоніі нібыта за абразу прэзідэнта ды іншых дзяржаўных чыноўнікаў праз яе каментары ў Telegram-чаце. Акрамя таго, ёй быў прызначаны вельмі буйны штраф. Яна з'яўляецца палітзняволенай, і я, што вырасла ў дэмакратычным грамадстве са свабодай слова і друку, магу зразумець абвінавачванні супраць яе толькі як самавольства таталітарнага рэжыму. Ганна ведала, на што здольны беларускі рэжым, і яна яго не спалохалася. Былыя сукамерніцы асцерагаюцца, што яна можа не перажыць свайго знаходжання ў турме: яна пакутуе на псарыяз, які пагаршаецца праз працу з абівальнай тканінай, і дзяўчына не атрымлівае дапамогі ад сваёй сям'і. Ганна змагаецца за свае правы і правы ўсіх людзей у Беларусі. Яе смеласць і ўпэўненасць вартыя пераймання. Яна і ўсе палітвязні з'яўляюцца святлом у цемры дыктатуры ў Беларусі. Таму так важна падтрымліваць дэмакратычны рух, і я настойліва заклікаю Лукашэнку неадкладна вызваліць Ганну і ўсіх астатніх палітычных зняволеных!"