У абарону салігорскіх міліцыянтаў
Запіс пад такой назвай размясціў у сваім блогу на сайце САЛІГОРСК.org Павел Батуеў, які ўваходзіць у склад ініцыятыўнай групы Алеся Міхалевіча.
"Ужо некалькі тыдняў я збіраю подпісы за вылучэнне Аляксея Міхалевіча кандыдатам у прэзідэнты. Літаральна пазаўчора я зайшоў з гэтай нагоды у дом, дзе жывуць салігорскія міліцыянты. Да майго здзіўлення, жыхары гэтага дому не адмаўляліся ставіць свае подпісы ў падтрымку апазіцыйнага прэтэндэнта ў кандыдаты. Iнфармацыя пра гэта з'явілася на маёй прыватнай старонцы на facebook i vkontakte, a ўжo cёння з крыніцаў, што выклікаюць давер, я атрымаў звесткі аб тым, што кіраўніцтва салігорскай міліцыі вельмі цікавіць колькасць тых, хто падпісаўся і іхныя прозвішчы. У сувязі з гэтым я прыняў рашэнне не здаваць тыя падпісныя лісты ў выканкам, каб засцерагчы тых, хто падпісаўся, ад магчымага ціску з боку кіраўніцтва салігорскага РАУС", - заяўляе ў блогу Павел.
Інфармацыя аб тым, што "міліцыя падтрымала незалежнага прэтэндэнта ў кандыдаты", з'явілася днём раней таксама на праваабарончых сайтах і некаторых буйных інтэрнэт-парталах. І ўжо на наступны дзень пайшла рэакцыя кіраўніцтва мясцовага аддзелу міліцыі. Салігорскі блогер не стаў раскрываць крыніцу, з якой яму стала вядома пра ціск на супрацоўнікаў РАУС, але свае думкі з гэтай нагод выказаў грамадскі актывіст Салігорска Аляксей Валабуеў:
- Верагодна, нехта з тых міліцыянтаў, хто пакінуў свой подпіс за Міхалевіча, скантактаваўся з Паўлам і папрасіў не здаваць тыя подпісы. Але ж важна, што гэта інфармацыя агучана. Перакананы, цяпер кіраўніцтву РАУС давядзецца папусціцца. Бо калі супраць сваіх жа супрацоўнікаў увядуць нейкія санкцыі з-за іх подпісаў за вылучэнне кандыдата, дык гэта ўжо будзе рэальны перадвыбарчы скандал.
Прадстаўнікі кампаніі "Праваабаронцы за свабодныя выбары" будуць і надалей сачыць за гэтай сітуацыяй.
"Праваабаронцы за свабодныя выбары"
