Баранавічы: Грамадска-палітычныя актывісты вырашылі засяродзіцца на гарадскіх выбарчых участках
Баранавіцкі гарвыканкам
У Баранавічах з апазіцыйных палітычных партый і грамадскіх арганізацый толькі мясцовыя філіі сацыял-дэмакратаў, партыі левых “Справядлівы свет” і ТБМ вылучылі сваіх прадстаўнікоў ва ўчастковыя выбарчыя камісіі. Адпаведныя пратаколы пададзены ў арганізацыйна-кадравы аддзел Баранавіцкага гарвыканкама.
Кіраўнік мясцовых сацыя-дэмакратаў Вячаслаў Болбат адзначыў, што яны вылучаюць 4-х сваіх прадстаўнікоў на выбарчыя ўчасткі №№ 16, 31, 34, 36. Пакуль з палітычных партый найбольшай актыўнасцю вылучаецца баранавіцкая філія партыі левых “Справядлівы свет”, якая вылучыла 7 сваіх прадстаўнікоў ва ўчастковыя камісіі выбарчых участкаў №№ 15, 16, 19, 31, 34, 36, 41.
Ад недзяржаўных грамадскіх арганізацый толькі Таварыства беларускай мовы вылучыла Сяргея Гоўшу (выбарчы ўчастак № 43), Карнея Пятровіча (выбарчы ўчастак № 8) і Рыгора Грыка (выбарчы ўчастак № 20) у склад выбарчых камісій. Варта адзначыць, што баранавіцкія актывісты вырашылі засяродзіцца на гарадскіх выбарчых участках, бо на раён, нажаль, не хапае людскіх рэсурсаў.
“Праваабаронцы за свабодныя выбары”
