Аршанскі раён: Працэдура дэмакратычная, але апазіцыя за бортам УВК
У аўторак 2 лістапада на паседжанні Аршанскага райвыканкама былі сфармаваныя ўчастковыя камісіі па выбарах Прэзідэнта. На паседжанні прысутнічаў прадстаўнік РГА "БХК" Васіль Леўчанкаў.
У цэлым паседжанне, на якім былі сфармаваныя 43 участковых камісіі, праходзіла дэмакратычна. Было агучана, што ў склад камісій вылучаны 461 чалавек. З іх 180 ад грамадзян, 44 - ад працоўных калектываў, 237 - ад грамадскіх аб'яднанняў і партый. Кожная з 461 вылучаных кандыдатур асобна выносілася на галасаванне, вынікі якога занасіліся ў пратакол. У выніку было зацверджана 457 сябраў камісій, не зацверджана - 4.
Разам з тым застаецца ўражанне, што гэта паседжанне было добра адрэжысіравана загадзя. У карысць гэтага кажа тое, што практычна ўсе галасаванні былі аднагалоснымі, праходзілі без абмеркавання кандыдатур, а за бортам, як і варта было чакаць, засталіся прадстаўнікі апазіцыі. Усе чацвёра адхіленых кандыдатаў прадстаўляюць партыю левых «Справядлівы свет».
"Праваабаронцы за свабодныя выбары"
