Магілёўшчына: З мінулых выбараў склад участковых камісій не змяніўся
Незалежны журналіст Барыс Вырвіч
Раённыя газеты Бялыніцкага, Круглянскага і Шклоўскага раёнаў пачалі публікацыю спісаў сяброў участковых камісій па выбарах прэзідэнта Рэспублікі Беларусь. Пры ўважлівым разглядзе высветлілася, што склад гэтых камісій амаль не змяніўся з мясцовых выбараў, якія прайшлі 25 красавіка гэтага года.
Гаворыць назіральнік пры Бялыніцкай раённай камісіі па выбарах прэзідэнта Рэспублікі Беларусь Барыс Вырвіч:
- Я з’яўляюся выдаўцом незалежнай маланакладнай газеты “Рэгіён”, якая распаўсюджваецца на тэрыторыі Бялыніцкага, Круглянскага і Шклоўскага раёнаў, таму заўсёды імкнуся ўважліва адсочваць падзеі, якія адбываюцца ў нашым рэгіёне. Калі я параўнаў склад участковых камісій для галасавання на маючых адбыцца прэзідэнцкіх выбарах і тых жа ўчастковых камісій на мясцовых выбарах, што прайшлі ў красавіку гэтага года, высветлілася, што ён змяніўся вельмі нязначна. Такая карціна назіраецца ва ўсіх трох раёнах нашага рэгіёна, ёсць камісіі, дзе не памянялася ні аднаго чалавека, у іншых адбылася замена аднаго-дзвюх. Больш за тое, у Бялыніцкім раёне склад многіх участковых камісій змяніўся вельмі нязначна нават у параўнанні з 2008 годам, калі адбывалісь выбары ў Палату прадстаўнікоў Нацыянальнага Сходу Рэспублікі Беларусь. Так, на Савецкім № 1 і Калінінскім № 3 участках для галасавання ў г. п. Бялынічы па 13 чалавек з 17 працавалі ў складзе камісій пад час выбараў у Палату прадстаўнікоў, у Вішоўскім № 6 і Малакудзінскім № 10 – па 10 з агульнай колькасці ў трынаццаць членаў камісій і г.д.
“Праваабаронцы за свабодныя выбары”
