Барысаў: ТВК перайменавала "працоўны момант" у "бягучыя пытанні"
Барысаўскі райвыканкам
Назіральнік Алег Мацкевіч атрымаў адказ з Барысаўскай ТВК на сваю пісьмовую просьбу растлумачыць, чаму яго не пусцілі на паседжанне, названае сакратаром камісіі "рабочым момантам".
Апынулася, што сябры Барысаўскай ТВК трактуюць выбарчае заканадаўства на здзіўленне вольна. Як вынікае з адказу, "04.11 у кабінеце 314 будынка Барысаўскага райвыканкама асобнымі сябрамі Барысаўскай тэрытарыяльнай выбарчай камісіі па выбарах прэзідэнта Рэспублікі Беларусь разглядаліся бягучыя пытанні, звязаныя з падрыхтоўкай і правядзеннем выбараў, па якіх не патрабуецца прыняцця рашэння як калегіяльнага органа і, адпаведна, складання пратаколу . Такім чынам, Вашыя правы як назіральніка не парушаныя ".
Дзіўная казуістыка. У тым жа адказе ТВК гаворыцца: "Праца Барысаўскай тэрытарыяльнай выбарчай камісіі ажыццяўляецца ў адпаведнасці з арт.37 Выбарчага кодэкса РБ пасродкам правядзення паседжанняў камісіі. На паседжанні камісіі вядзецца пратакол, які падпісваецца старшынёй і сакратаром камісіі ". І "лагічны" працяг: "Аднак у ходзе правядзення выбарчай кампаніі ўзнікаюць бягучыя пытанні, якія вырашаюцца сябрамі камісіі без правядзення паседжання".
Алег Мацкевіч паведаміў, што не задаволены "тлумачэннямі" Барысаўскай ТВК і мае намер звярнуцца з заявай у ЦВК.
"Праваабаронцы за свабодныя выбары"
