Брэст: Да візіту Мікалая Статкевіча арганізаваны інфармацыйныя пікеты
Як распавёў давераная асоба гэтага кандыдата ў прэзідэнты Віктар Чайкоўскі, асноўным месцам для пікетавання была абраная пляцоўка каля ўваходу на цэнтральны рынак, дзе вельмі актыўна ішоў збор подпісаў за вылучэнне Статкевіча ў якасці прэтэндэнта на пасаду кіраўніка дзяржавы. У ходзе пікетаў, якія праводзяцца з пачатку цяперашняга тыдня, выбаршчыкам раздаюцца інфармацыйныя матэрыялы пра кандыдата і берасцейцаў запрашаюць наведаць сустрэчу з Мікалаем Статкевічам, вызначаную на вечар 3 снежня. Такі ж пікет у другі дзень каляндарнай зімы быў арганізаваны і ў брэсцкім мікрараёне Усход, паблізу гандлёвага цэнтра «Юбілейны», а аб'явы аб маючай адбыцца сустрэчы з'явіліся ў двух незалежных газетах горада і расклейваюцца на інфармацыйных тумбах.
Па словах Віктара Чайкоўскага, у апошні час адчуваецца прыкметная цікавасць выбаршчыкаў да асобы кандыдата ў прэзідэнты, чаму паспрыялі перадвыбарныя выступы Мікалая Статкевіча па дзяржаўнаму тэлебачанню і радыё.
Варта адзначыць, што ў Брэсце цяпер рэгулярна праводзяцца пікеты ў падтрымку двух кандыдатаў - Уладзіміра Някляева і Віталя Рымашэўскага, а ў мінулыя выходныя разавую акцыю правялі і прыхільнікі Аляксандра Лукашэнкі.
"Праваабаронцы за свабодныя выбары"
