Улады ігнаруюць зварот таксістаў

Чатыры месяцы беларускія таксісты чакаюць адказу на свой зварот ад Міністэрства транспарту. Таксісты патрабавалі не прымаць указ, які вымагае ад іх набыцця новых аўтамабіляў мясцовай зборкі.

Такое ігнараванне амаль паўтысячы работнікаў сферы транспартных паслуг паказывае, што грамадcкая думка чыноўнікаў не цікавіць, кажа актывіст па збору подпісаў Сяргей Верамеенка:

- Улады жывуць сабе, а людзі сабе. Яны ствараюць сваё заканадаўства, яны ствараюць законы, выпускаюць розныя ўказы. Мы павінны іх выконваць, прынамсі яны так мяркуюць. Няма ніякага грамадскага абмеркавання, меркаванні не ўлічваюцца, яны проста даводзяць свае думкі таго, якім павінна быць нашае грамадства.

Напрыканцы 2013 года зварот быў дасланы ў Міністэрства транспарту, а копія была адпраўлена ў адміністрацыю прэзідэнта Беларусі. Таксісты даводзілі, што ўказ пра некаторыя пытанні арганізацыі перавозак аўтамабілямі-таксі значна пагоршыць, а не палепшыць эканоміку гэтай сфэры дзейнасці.