Цяпер Рымашэўскі не зможа быць заяўнікам масавых акцый яшчэ год
Фота "Радыё Свабода"
Суд Мінскага раёну 29 кастрычніка асудзіў сустаршыню Беларускай хрысціянскай дэмакратыі Віталя Рымашэўскага да штрафу ў памеры 30 базавых велічыняў (735 рублёў), паведамляе bchd.info. Яго пакаралі па арт. 23.34 КаАП (парушэнне парадку арганізацыі або правядзення масавых мерапрыемстваў) за тое, што ён стаяў на фоне бела-чырвонага белага сцягу і выказваў публічна меркаванне ў дачыненні да рэстарацыі “Поедем-поедим”.
Пры гэтым суддзя падчас паседжання спытаў у яго, ці меў ён дазвол на выказванне свайго меркавання і калі так, то хто яго даў.
“Гэта ўсё, што трэба ведаць пра наш беларускі суд”, - адзначыў Віталь Рымашэўскі.
Палітык таксама нагадаў, што цяпер цягам году ён не можа быць заяўнікам любых масавых акцый. Аб гэтым гаворыцца ў артыкуле 4 Закона Рэспублікі Беларусь "Аб масавых мерапрыемствах": "асобы, якія дапусцілі парушэнне парадку арганізацыі або правядзення масавага мерапрыемства, на працягу аднаго года пасля накладання адміністрацыйнага спагнання за такое парушэнне не могуць выступаць арганізатарамі масавага мерапрыемства".
