7 сутак арышту. Як асудзілі журналістку Анастасію Захарэвіч
У судзе Цэнтральнага раёна горада Менска прайшло судовае паседжанне над журналісткай-фрылансеркай Анастасіяй Захарэвіч. Паказанні сведкі Цітова (міліцыянта Цэнтральнага РУУС) не супалі з пратаколам і рапартам, падпісаным яго імем, аднак гэта не перашкодзіла суддзі Шабуне вынесці рашэнне аб арышце ў 7 сутак (частка 1 артыкула 23.34 КаАП).
- Перад судовым пасяджэннем сакратарка змясціла кампутар з трансляцыяй Анастасіі Захарэвіч такім чынам, што гледачы не маглі яе бачыць
У судовым пасяджэнні Анастасія Захарэвіч удзельнічала праз відэаканферэнцсувязь з дапамогай праграмы Skype. На дадзены момант яна знаходзіцца ў ізалятары часовага ўтрымання (1-ы завулак Акрэсціна). Затрымалі журналістку пятага верасня ў 16.45, згодна са складзеным пратаколам. Таксама ў пратаколе пазначана, што Анастасія наўмысна парушыла закон Аб масавых мерапрыемствах, паўдзельнічаўшы ў вулічным шэсці ў перыяд часу з 15.30 да 16.30 па маршруце ад вуліцы Веры Харужай, 8 да праспекта Незалежнасці, 47. Сама Анастасія патлумачыла на судзе, што сапраўды знаходзілася там, аднак лозунгі не выкрыквала, не мела ніякай атрыбутыкі і вялікую частку часу ішла ў баку ад калоны. Яна рабіла фатаграфіі шэсця, каб пасля частку з іх размясціць на сваёй старонцы facebook, а ў выпадку цікавасці да іх з боку СМІ – прадаставіць іх ім. Анастасія з'яўляецца журналісткай-фрылансеркай і апошнія тры гады працуе па дамове падраду, актыўна супрацоўнічае з TUT.BY і "Экадом".
Сведка Андрэй Цітоў (па сумяшчальніцтве супрацоўнік Цэнтральнага РУУС) у сваім выступе праз відэасувязь нечакана заявіў, што затрымаў Насту каля шасці вечара. Гэта высветлілася пасля пытанняў да сведкі з боку адваката Захарэвіч:
— Калі вы бачылі Захарэвіч?
— У палову шостага.
— А затрымалі?
— Каля шасці.
— Вы добра памятаеце падзеі?
—Не вельмі.
— Чаму менавіта яе затрымалі? Там было каля 1000 чалавек.
— Цяжка адказаць.
— Як доўга назіралі Захарэвіч?
— Нядоўга.
— Вы ўпэўненыя, што яна ўдзельнічала?
— Удзельнічала
— З чаго гэта вынікае?
— Рухалася ў складзе калоны.
— Я ж пытаюся, ці доўга вы назіралі? Вы адказалі, што нядоўга.
— Гэта паняцце няпэўнае.
— Канкрэтна можаце сказаць, што рабіла Захарэвіч?
— Не.
— Час затрымання ў пратаколе пазначаны дакладна?
— Думаю, што так.
Суддзя Шабуня вырашыла зачытаць рапарт Цітова, з якога вынікае, што ён бачыў, як пятага верасня група грамадзян ішла па марштруце ад вуліцы Веры Харужай, 8. Сярод іх была Захарэвіч. Затрыманьне адбылося ў 16.45. Аднак сведка на гэта нічога не змог патлумачыць.
Сама Анастасія Захарэвіч адзначыла, што мае магчымасць аплаціць штраф, калі такім будзе рашэнне суда.
"Я вельмі моцна замерзла пасля двух сутак у ізалятары і мне патрэбна медыцынская дапамога", — сказала яна падчас судовага паседжання.
Як распавяла маці Анастасіі, яе дачка мае патрэбу ў штодзённым прыёме лекаў, аднак у ізалятары ёй іх не хопіць. Сакратарка не дала пагутарыць маці з дачкой пасля суда, адразу зачыніўшы экран кампутара. Маці Анастасія адправілася ў ІЧУ на Акрэсьціна, каб паспрабаваць перадаць лекі.
