Пацярпелыя ад судовай сістэмы просяць заснаваць Грамадскую камісію па пераглядзе крымінальных і грамадзянскіх спраў

Група жанчын, чые родныя, блізкія, а таксама яны самі пакутавалі ад памылак беларускай судовай сістэмы, просіць ініцыяваць стварэнне Грамадскай камісіі па пераглядзе крымінальных і грамадзянскіх спраў. Адпаведны ліст будзе накіраваны прэзідэнту А. Лукашэнку, старшыні Палаты Прадстаўнікоў Нацыянальнага Сходу РБ У.Андрэйчанка, старшыні Савета Рэспублікі Б.Батуру.

Як распавяла юрыст Тамара Сяргей, сёння ніхто не застрахаваны ад судовых памылак: "Народная мудрасць гаворыць: "Ад сумы і турмы не заракайся". Пры той карумпаванасці службоўцаў, з якой многія сутыкаліся і пра якую кажуць на самым высокім узроўні, ніхто не можа быць застрахаваны ад таго, што яму спатрэбіцца  дапамога незалежнай грамадскай камісіі па пераглядзе крымінальных і грамадзянскіх спраў, - адзначае юрыст. - У Вялікабрытаніі, напрыклад, грамадская камісія па пераглядзе крымінальных спраў дзейнічае з 1997 года".