Гомельскі чыноўнік адказаў праваабаронцам: інфармацыі па каранавірусу дастаткова. Ці так гэта?
Намеснік старшыні Гомельскага гарвыканкама Віталь Атаманчук. Фота: dneprovec.by
Гомельскі гарвыканкам лічыць, што ў горадзе дастаткова інфармацыі па эпідэміялагічнаму становішчу, якое складваецца з распаўсюджваннем каранавіруснай інфекцыі.
Пра гэта 18 красавіка ў адрас праваабаронцы Леаніда Судаленкі паведаміў намеснік старшыні гарвыканкама Віталь Атаманчук.
У адказе чыноўнік спасылаецца на галоўнае ўпраўленне аховы здароўя Гомельскага аблвыканкама, абласны Цэнтр гігіены, эпідэміялогіі і грамадскага здароўя і гарадскі Цэнтр гігіены, эпідэміялогіі, дзе па яго словах функцыянуюць штодзённыя гарачыя тэлефонныя лініі.
«Падрабязную інфармацыю аб эпідэміялагічнай сітуацыі з нагоды распаўсюджвання каранавіруснай інфекцыі ў Гомелі і Гомельскай вобласці можна атрымаць на сайце Міністэрства аховы здароўя - minzdrav.gov.by», - дадае Віталь Атаманчук.
“Гомельская Вясна” звярнулася да незалежнай журналісткі Алены Германовіч з пытаннем, ці дастаткова шырока чыноўнікі асвятляюць сітуацыю вакол распаўсюджвання короновирусной інфекцыі ў Гомелі і рэгіёне.
«Што тычыцца менавіта Гомельскай вобласці, то афіцыйнай інфармацыі наогул няма. Раз у тыдзень Міністэрства аховы здароўя дае "голыя" лічбы па вобласці, статыстыку і ўсё! Усе раённыя бальніцы адпраўляюць у прэс-службу аблвыканкама. Але нажаль, там даюць інфармацыю «ні пра што». Адказваюць, да прыкладу, што "ў вобласці зарэгістраваныя адзінкавыя выпадкі захворванняў сярод медыкаў" і ўсё. Між тым, мы ведаем, медыкі хварэюць, але ім забаронена "распростаняться" і мець зносіны з незалежнымі СМІ», - пракаментавала сітуацыю журналістка.
Нагадаем, 2 красавіка праваабаронца і юрыст гомельскага аддзялення ПЦ “Вясна” Леанід Судаленка накіраваў у гарвыканкам зварот па пытанню з сітуацыяй вакол распаўсюджвання каранавіруснай пандэміі ў рэгіёне, якая пагаршаецца з кожным днём.
Ён прасіў кіраўніцтва горада ў неадкладным парадку стварыць кругласутачную прамую лінію, дзе кожны і ў любы час у рэжыме онлайн мог задаць адказным прадстаўнікам аховы здароўя пытанні і атрымаць на іх кампетэнтныя адказы.
У звароце таксама змяшчалася просьба абавязаць абласное ўпраўленне аховы здароўя праводзіць штодзённыя публічныя справаздачы аб сітуацыі, якая складваецца ў горадзе і рэгіёне падчас эпідэміі сітуацыі з абавязковым указаннем актуальнай статыстыкі тых, хто захварэў, вылечыць і памерлых грамадзян.
Вычакаўшы 15 дзён, чыноўнікі запэўнілі праваабаронцаў, што інфармацыі па каранавірусу дастаткова.
