342 КК: Антон Лакішык пад вартай, Уладзімір Казаноўскі выйшаў на волю
CІЗА № 1 па вул. Валадарскага ў Мінску. Фота ПЦ "Вясна"
Як стала вядома Праваабарончаму цэнтру "Вясна", яшчэ 23 ліпеня быў затрыманы Антон Лакішык. З таго часу ён знаходзіцца ў СІЗА №1 у Мінску.
Маці хлопца распавяла, што Антон Лакішык затрыманы ў межах крымінальнай справы па ч. 1 арт. 342 Крымінальнага кодэкса (Арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх). Але па якім менавіта эпізодзе праходзіць хлопец, жанчына не ведае, бо знаходзілася за горадам.
Да гэтага, Антон Лакішык быў затрыманы 14 ліпеня ў Мінску. Суд над ім павінен быў распачацца 28 ліпеня ў судзе Маскоўскага раёна Мінска. Хлопца вінавацілі ва ўдзеле ў несанкцыянаваным масавым мерапрыемстве па арт. 23.34 КаАП. Аднак суд так і не адбыўся - быў перанесены на невызначаны тэрмін.
Таксама праваабаронцам вядома, што 5 жніўня на волю выйшаў Уладзімір Казаноўскі. Ён праходзіць па крымінальнай справе, узбуджанай па ч.1 арт. 342 КК пасля падзеяў 14 ліпеня ў Мінску. Уладзімір Казаноўскі адсядзеў 20 сутак арышту, і быў вызвалены ў статусе падазраванага.
