Ціск на палітвязняў і суды за "экстрэмізм": хроніка пераследу 7-9 снежня Дапоўнена

У Беларусі не спыняюцца затрыманні, ператрусы, катаванні ў ізалятарах, аказваецца ціск на палітвязняў, незалежныя медыяпрадукты прызнаюць "экстрэмісцкімі матэрыяламі і фармаваннямі". Праваабарончы цэнтр "Вясна" 7-9 снежня 2024 году збірае факты палітычнага пераследу беларусаў і беларусак. Інфармацыя ўвесь час дапаўняецца.

Уладальнік гродзенскага блога "S13" Сяргей Чабоцька не выйшаў на волю пасля 45 сутак адміністрацыйнага арышту

Сяргей Чабоцька

Пра гэта паведаміў  Hrodna.life. 

Трэція 15 сутак адміністрацыйнага арышту ў Сяргея скончыліся 7 снежня. Ён не выйшаў на волю.

Пра чарговы адміністрацыйны суд невядома. Верагодна, мужчыну ўзялі пад варту.

Рэдактара блога "S13" затрымалі 23 кастрычніка. Яго судзілі тройчы — за "распаўсюд экстрэмісцкіх матэрыялаў" і "пікет" у інтэрнэце. Напрыканцы кастрычніка стала вядома, што кантэнт "S13" і яго сацсеткі прызнаныя "экстрэмісцкімі матэрыяламі".

Мабільны дадатак "Беларусь ID" прызнаны "экстрэмісцкім фармаваннем"

Адпаведнае рашэнне прынятае КДБ 3 снежня. Паводле ведамства, дачыненне да "Беларусь ID" маюць Павел Лібер і Міхаіл Ананьін. З дапамогай гэтага дадатку праходзіла верыфікацыя людзей на выбарах у Каардынацыйную раду.

Таксама спіс "экстрэмісцкіх фармаванняў" папоўнілі тры праекты

Гэта "Городской огород Марис Мар", "s13ru", "письмо.бeл". Усе яны былі прызнанаыя «экстрэмісцкімі фармаваннямі» па заявах КДБ. Пры гэтым, у рашэнні ведамства пазначаныя лістападаўскія даты — а ў адпаведным спісе яны з'явіліся толькі дзявятага снежня.

Да вышэйзгаданых праектаў, паводле КДБ, дачыненне маюць Яна Царук, Марыя Батальёнак, Анастасія Марозава ("Городской огород Марис Мар"), Сяргей Чабоцька, Раман Алешка (s13ru), Аляксандр Мазур, Сяргей Антусевіч, Павел Красоўскі, Павел Каранюхін, Аляксандр Лыкшын (письмо.бeл).

Уладальніка кафэ-рэстарана з Мёраў будуць зноў судзіць за "экстрэмізм" — пасяджэнне пройдзе ў суседнім райцэнтры

Агіф Байрамаў

Справу Агіфа Салікавіча Байрамава 27 лістапада разглядалі ў судзе Мёрскага раёну. Мужчыну абвінавачвалі паводле ч. 2 арт. 19.11 КаАП (распаўсюд экстрэмісцкіх матэрыялаў).

Як паведаміў тэлеграм-канал "Витебск, я гуляю!", Агіфа будуць судзіць зноў — цяпер яго будуць судзіць 12 снежня ў судзе Верхнядзвінскага раёна. Справу прызначаны разглядаць суддзя Віктар Баліка.

Нагадаем, Байрамаў у 2023 годзе адкрыў у Мёрах кавярню "Аладзін", якая з тых часоў прырасла банкетнай залай на 150 чалавек і цалкам вырасла ў рэстаран — адзіны ў райцэнтры такой катэгорыі. Пра гэтую кропку грамадскага харчавання не раз пісала мясцовая раёнка.

Палітвязня Елісея Кузняцова будуць трэці раз судзіць па крымінальнай справе

Елісей Кузняцоў

21-гадовага хлопца ўжо двойчы судзілі. У 2020 годзе яго асудзілі да 2,5 гадоў "хатняй хіміі" паводле двух артыкулаў Крымінальнага годэкса. Пазней за "парушэнні" яму замянілі пакаранне на пазбаўленне волі. 17 снежня 2022 года Елісей цалкам адбыў тэрмін і выйшаў на волю з наваполацкай калоніі № 1.

23 траўня 2023 года стала вядома, што Елісея зноў паказальна заключылі пад варту ў Высокаўскім аграрным каледжы. У жніўні 2023 года яго асудзілі да 2,5 годоў калоніі ва ўмовах агульнага рэжыму за тры сарваных дзяржаўных сцяга. Палітвязень адбывае тэрмін у барысаўскай калоніі № 14. 

Цяпер Елісея абвінавачваюць паводле ч. 1 арт. 411 КК (злоснае непадпарадкаванне патрабаванням адміністрацыі калоніі). Суд над ім распачнецца ў Барысаве 18 снежня. Справу будзе весці суддзя Людміла Зінкевіч.