Затрыманне за відэа ў TikTok і суд над экс-палітвязнем: хроніка пераследу 10 снежня Дапоўнена

У Беларусі не спыняюцца затрыманні, ператрусы, катаванні ў ізалятарах, аказваецца ціск на палітвязняў, незалежныя медыяпрадукты прызнаюць "экстрэмісцкімі матэрыяламі і фармаваннямі". Праваабарончы цэнтр "Вясна" 10 снежня 2024 году збірае факты палітычнага пераследу беларусаў і беларусак. Інфармацыя ўвесь час дапаўняецца.

Супраць пяці "каліноўцаў" распачалі спецвытворчасць — іх збіраюцца судзіць завочна

Гаворка пра Арцёма Бігеля, Вячаслава Граноўскага, Ігнація Кірэева, Анастасію Махамет, Яна Мельнікава.

Паводле Следчага камітэту, "акрамя ўдзелу ў баявых дзеяннях на тэрыторыі суседняй дзяржавы, група аб'яднана ідэяй уварвання ў Рэспубліку Беларусь для ініцыявання ўзброеных сутыкненняў з праваахоўнымі органамі і ўзброенымі сіламі нашай краіны, гвалтоўнай змены канстытуцыйнага ладу, захопу дзяржаўнай улады злачынным шляхам і ліквідацыі грамадзян, нязгодных з прапагандуемай ідэалолгіяй".

Фігурантам інкрымінаваны шэраг артыкулаў крымінальнага кодэксу, сярод які "акт тэрарызму" і "арганізацыя дзейнасці тэрарыстычнай арганізацыі".

Адбыўся ператрус у мінскай рэкламнай агенцыі AdPlanes

Да рэбрэндынгу яна мела назву Vondel.

Вядома, што кіраўніцтва агенцыі на працу не прыйшло, у супрацоўнікаў падчас ператрусу правяралі мабільныя тэлефоны на "забароненыя" падпіскі.

Чарговае папаўненне Спіса экстрэмісцкіх матэрыялаў

У яго трапілі:

• Telegram-каналы і чаты "Україна Online Чат", "Nord Division", "ITnews";
• Instagram старонкі "baj.media.bу", "pozirk_online", "starye_dorogi_life", "liauchuk", "jan_de_rudione", "thewesternbattalion";
• Сайт і сацсеткі праекту "veraplus.оrg";
• Старонка ва "Укантакце" "Горжусь Беларусью!";
• Старонкі ў TikTok "Легион Свобода России", "Дужая&кiназалежная2, "Biełaruskipatryjot".

18-гадовую беларуску затрымалі за відэа ў TikTok пра міліцыянтаў

Праўладныя тэлеграм-каналы напісалі, што дзяўчына "праявіла "клопат" пра знаёмага супрацоўніка — словы не падбірая".

Яны таксама апублікавалі два скрыншоты з відэа беларускі — на адным "Сначала менты нам не кенты", на другім "Ничего необычного, просто кормлю мента у себя дома (чтоб не забрал в обезьянник)".

Паведамляецца, што на дзяўчыну складзены адміністрацыйны пратакол. Па якім артыкуле — невядома.

70-гадовага былога палітвязня зноў будуць судзіць за "распаўсюд экстрэмізму"

Аляксандр Патапаў

Аляксандр Патапаў з вёсцы Хатоля Віцебскай вобласці быў затрыманы напрыканцы жніўня 2022 года ў межах крымінальнай справы за абразу Лукашэнкі ў каментарах у "Аднакласніках".

Мужчына паходзіць з Украіны. Падчас ракетнага абстрэлу Кіева загінула пляменніца Аляксандра, а ейная трохгадовая дачка была сур'ёзна параненая. Пасля гэтага, знаходзячыся пад уплывам эмоцый, 8 і 16 ліпеня 2022 года Патапаў размясціў у сацыяльнай сетцы два каментары, якія экспертыза палічыла "абразлівымі". Пазней мужчыну асудзілі да 2 гадоў калоніі. Пенсіянер вызваліўся гэтай вясной, цалкам адбыўшы тэрмін.

31 кастрычніка справу Патапава разглядалі ў судзе Віцебскага раёна — яго абвінавачвалі ў "распаўсюдзе экстрэмісцкіх матэрыялаў" (ч. 2 арт. 19.11 КаАП).

Як паведаміў "Витебск, я гуляю!", імя мужчыны зноў з'явілася ў раскладзе суда Віцебскага раёну — 12 снежня яго справу за "распаўсюд экстрэмізму" будзе разглядаць Таццяна Лабацкая.