Гарадзенскі абласны суд не задаволіў скаргу партыі левых “Справядлівы свет”
6 кастрычніка ў Гарадзенскім абласным судзе адбыўся разгляд скаргі мясцовай арганізацыі Беларускай партыі левых “Справядлівы свет” на неўключэнне яе прадстаўніка Анатоля Іванчыка ў склад Гарадзенскай абласной тэрытарыяльнай выбарчай камісіі. Інтарэсы абласной арганізацыі партыі на працэсе прадстаўляў Віктар Міхальчык.
На судзе прысутнічалі прадстаўнікі аблвыканкаму, у прыватнасці Сяргей Хацук, намеснік кіраўніка ўпраўлення арганізацыйна-кадравай работы і супрацоўніца юрыдычнага аддзелу гэтай дзяржаўнай установы.
Суддзя Вячаслаў Міхневіч, выслухаўшы два бакі, скаргу абласной арганізацыі Беларускай партыі левых “Справядлівы свет” не задаволіў. Судовае паседжаннне ў прысутнасці намесніка пракурора Гарадзенскай вобласці доўжылася каля 50 хвілін. На адкрытым працэсе былі таксама мясцовыя праваабаронцы.
Прадстаўнік БХК Раман Юргель так пракаментаваў рашэнне суда: “Ніхто і не спадзяваўся на нейкую сенсацыю. Такія разгляды, як павялося, звычайна лёгка прадказальныя. Самае галоўнае, што так і не былі агучаны крытэрыі, якімі чыноўнікі аблвыканкаму і аблсавету кіраваліся пры ўключэнні ў абласную ТВК таго ці іншага прадстаўніка”.
“Праваабаронцы за свабодныя выбары”
