Брэсцкі абласны суд таксама падтрымаў кіраўніцтва “Граніту”
Мікалай Карышаў
Абласны суд пакінуў рашэнне суда Лунінецкага раёна без зменаў, а скаргу намесніка старшыні суполкі незалежнага прафсаюза на прадпрыемстве “Граніт” Мікалая Карышава без задавальнення.
У непрацягненні працоўнага кантракта з Мікалаем Карышавым абласны суд, як і раённы, не ўбачыў ніякіх парушэнняў з боку адміністрацыі прадпрыемства.
Тым часам прадстаўнік Карышава ў судзе юрыст-праваабаронца Уладзімір Малей бачыць прычыну звальнення менавіта ў яго ўступленні ў суполку незалежнага прафсаюза. Новы кантракт з актывістам адміністрацыя “Граніта” адмовілася падпісваць нібыта з-за вымоў, якія былі вынесены Карышаву цягам некалькіх дзён падчас праверкі, хоць за сем гадоў працы на прадпрыемстве ніякіх заўвагаў рабочы не атрымліваў. Да ўступлення ў незалежны прафсаюз Карышаў характарызаваўся начальнікам цэха станоўча, яму нават прапаноўвалі пасаду зменнага майстра.
Мікалай Карышаў мае намер працягнуць сваё змаганне ў вышэйстаячых судовых органах. Калі не атрымае падтрымкі ў Беларусі, актывіст будзе звяртацца ў Міжнародныя структуры, у тым ліку ў Камітэт па правах чалавека ААН.
