Шыла зьвярнуўся да міністра ўнутраных справаў

Намесьнік старшыні Маладога Фронта Іван Шыла зьвярнуўся да Міністра ўнутраных справаў з адмысловым зваротам. У ім моладзевы актывіст гаворыць пра заканамернасьць выпадка ў Салігорскім ІЧУ, пасьля якога арыштаваны памёр у рэанімацыі. Ён патрабуе прызнаць неадпаведнасьць умоваў утрыманьня заканадаўчым нормам і пачаць вышарашыць гэтую праблему.

Прыводзім тэкст зварота цалкам.

"У Салігорскім ізалятары чалавек атрымаў траўмы і пасьля памёр у бальніцы. Інфармацыя зьявілася толькі праз месяц і толькі ў незалежных СМІ. І толькі зараз можна пачуць першыя камэнтары адносна гэтага здарэньня: начальнік Сьледчага камітэту салігорскага раёна гаворыць пра невінаватасьць супрацоўнікаў міліцыі і малюе асацыяльны вобраз загінуўшага - выпіваў, рэгулярна адбываў арышты і прыцягваўся да крымінальнай адказнасьці. Трапіў у ізалятар, упаў і памёр. Быццам бы, так і трэба, нічога і не здарылася, сам вінаваты.

Я не стану казаць, што адбылося ў дадзеным канкрэтным выпадку. Але, магу сказаць, хто ў гэтым вінаваты - палкоўнік Астрэйка, начальнік Салігорскай міліцыі. Ня важна, сам ці не сам упаў загінуўшы малады чалавек. Сьмерць у такім ізалятары - справа, нажаль, заканамерная.

Мінулым летам я двойчы адбываў адміністрацыйныя арышты. Падчас першага тэрміну я трымаў галадоўку з адзіным патрабаваньнем - каб выконваліся заканадаўчыя нормы ўтрыманьня вязьняў.

У ІЧУ няма асобных спальных месцаў, туалет знаходзіцца ў камэры і ўяўляе сабой дзірку ў падлозе, над якой два краны - адзін для “змыва”, другі для “піцьця”. Арыштаваным не прадастаўляецца асобных спальных месцаў, ігнаруюцца мінімальныя стандарты - многім даводзіцца спаць не проста на дошках, а на падлозе. Каля таго самага туалета.

Я адбываў пакараньне летам - камэры не праветрываюцца, тэмпэратура зашкальвае. Арыштаваных не водзяць у душ, а калі водзяць, выглядае гэта як саступка, якая залежыць ад настроя канвойных ці дзяжурнага. Пра прагулкі і гаворкі не ідзе - іх проста няма.

У камэрах цёмна круглыя суткі, не выконваюцца санітарныя нормы. Са словаў “дасьведчаных” сядзельцаў, матрацы мяняюць толькі пасьля таго, як нехта памірае. На жаль, у гэтыя словы я веру.

Канвойныя бяруць на сабе функцыю лекараў - яны самі вызначаюць, каму трэба, а каму ня трэба выклікаць мэдычную дапамогу. У ізалятар зьмяшчаюцца людзі ў стане алкагольнага апьяненьня - натуральна, што не атрымаўшы той дапамогі, якая прадугледжана, напрыклад, ў “выцьвярозьніку”, ім робіцца кепска. Я асабіста назіраў тры выпадкі, калі пасьля ігнараваньня з боку канвойных, людзі маглі памерці ў ізалятары. Тады абыйшлося.

Толькі на сёмы дзень маёй галадоўкі са мной сустрэўся намесьнік начальніка ізалятара - мяне звадзілі ў душ. На большае выкананьне сваіх абавязкаў супрацоўнікі міліцыі былі ня здольныя.

Падчас другога арышту ў мяне абвастрылася алергія, выкліканая кепскімі санітарнымі ўмовамі. Калі мне было асабліва кепска, я папрасіў канвойнага выклікаць хуткую дапамогу. Прамым тэкстам мяне паслалі. Лекары прыехалі толькі праз некалькі гадзінаў і мяне адразу шпіталізавалі.

Так атрымалася, што мой бацька, Уладзімір Шыла, таксама адбываў арышт мінулым летам. Пасьля гэтага ён зьвярнуўся са скаргай на ўмовы ўтрыманьня. Адбылася сустрэча з начальнікам міліцыі палкоўнікам Астрэйка. Усе патрабаваньні, выкладзеныя ў скарзе былі праігнараваныя і бацька не атрымаў нават пісьмовага адказу.

Зараз, пасьля знаходжаньня ў ізалятары, памёр чалавек. Ня важна, што скажуць сьледчыя. Гаворка пра тое, што гэта не выпадковасьць, бо ізалятар у салігорскай міліцыі - гэта катавальня і нават у здаровага чалавека там могуць узьнікнуць сур’ёзныя праблемы.

Салігорская міліцыя ведала і ведае пра тое, у якіх умовах утрымоўваюцца арыштаваныя. Але, упарта бязьдзейнічае.

І на маю думку, надыйшоў час прызнаць праблемы і пачаць іх вырашаць. Таму, я патрабую:

- Публічна прадэманстраваць відэазапіс інцыдэнта, які пацягнуў за сабой сьмерць чалавека.

- Дапусьціць у ізалятар для азнаямленьня з умовамі ўтрыманьня прадстаўнікоў грамадзкасьці і СМІ.

- Прыцягнуць да адказнасьці начальніка ІЧУ і начальніка Салігорскай міліцыі за невыкананьне службовых абавязкаў.

- Прывесьці стан ІЧУ у адпаведнасьць з заканадаўчымі нормамі ўтрыманьня арыштаваных.

Шыла Іван, 21.08.2012