Орша. Агітатараў затрымліваюць, агітматэрыялы размяшчаць не даюць
Міхаіл Кузьмянкоў, сябра выбарчага штаба кандыдата ў прэзідэнты Беларусі Андрэя Саннікава, на днях быў затрыманы аршанскімі міліцыянтамі. У момант затрымання Міхаіл расклейваў агітацыйныя матэрыялы за свайго кандыдата ў месцах, якія афіцыйна вылучаныя Аршанскім гарвыканкамам.
Нягледзячы на тое, што агітатар прад'явіў міліцыянтам свае дакументы, а таксама тэкст рашэння гарвыканкама, ён быў затрыманы і дастаўлены ў Аршанскі ГАУС. Праўда нічога супрацьзаконнага прад'явіць яму міліцэйскае начальства не змагло, праз паўгадзіны пасля затрымання актывіста адпусцілі.
З праблемамі сутыкнуўся і сябра каманды Віталя Рымашэўскага Яўген Анішчанка. Агітацыйныя плакаты за кандыдата катэгарычна адмовіліся браць у крамах "Мерком ", якія паводле тых жа рашэнняў гарвыканкама, з'яўляюцца месцамі для размяшчэння агітацыйнай прадукцыі. Па дадзеным факце Яўген падаў скаргу ў Аршанскую тэрытарыяльную камісію.
"Праваабаронцы за свабодныя выбары"
